ساہیوال: نگران وزیر اعلی پنجاب کا لینڈ ریکارڈ کے ای رجسٹریشن سسٹم کا افتتاح

نگران وزیر اعلی پنجاب محسن نقوی نے ساہیوال سے لینڈ ریکارڈ کے ای رجسٹریشن سسٹم کا باضابطہ افتتاح کرتے ہوئے دستاویزات حاصل کرنے کے عمل کا جائزہ لیا۔

ای رجسٹریشن کے تحت اراضی ریکارڈ کی تمام دستاویزات آن لائن دستیاب ہوں گی اور ٹیکس چوری کی روک تھام ہو گی۔ اس سے شہریوں کو اراضی سنٹرز کے بار بار چکر لگانے سے نجات ملے گی۔

وزیر اعلی محسن نقوی نے این 5 کے زیر التواء پل کو فوری مکمل کرنے کا حکم دیتے ہوئے کہا ہے کہ حکومت زیر التواء پل کی جلد تعمیر کے لیے ضروری فنڈز فراہم کرے گی۔

انہوں نے پاکپتن سے ساہیوال دورویہ سٹرک کی تعمیر کا اعلان کیا اور اولڈ جی ٹی روڈ کو جلد مکمل کرنے کی ہدایت کی. انہوں نے کہا کہ ساہیوال کی سٹرکوں کی تعمیر و مرمت کی بحالی کا کام جلد مکمل کیا جائے۔

ان کا مزید کہنا تھا کہ ڈسٹرکٹ ہیڈکوارٹر ہسپتال ساہیوال کی اپ گریڈیشن کے لئے وسائل دیں گے۔ انہوں نے سموگ پر قابو پانے کیلئے فصلوں کی باقیات کو جلانے پر زیرو ٹالرنس کی پالیسی اپنانے کا حکم دیا۔

وزیراعلیٰ محسن نقوی نے ڈپٹی کمشنر آفس ساہیوال میں ترقیاتی منصوبوں اورامن و عامہ سے متعلق اعلی سطح کے اجلاس کی صدارت کی. انہوں نے پنجاب انٹرمیڈیٹ سیٹز امپرومنٹ انوسمنٹ پروگرام کے تحت ساہیوال ڈویژن میں جاری ترقیاتی منصوبوں پر پیش رفت کا جائزہ لیا۔
اجلاس میں ایشیائی ترقیاتی بینک کے تعاون سے جاری پروگرام پر پیش رفت کا جائزہ لیا گیا۔ نگران وزیراعلیٰ پنجاب محسن نقوی کی زیر صدارت ساہیوال میں اراضی کی ڈیجیٹلائزیشن پلس پراجیکٹ سے متعلق اجلاس ہوا۔

عالمی بینک کے تعاون سے جاری پروگرام پر پیش رفت کا جائزہ لیاگیا۔ کمشنرساہیوال نے عوامی فلاح کے منصوبوں کے بارے میں بریفنگ دی، آر پی او ساہیوال نے امن وامان کی صورتحال کیلئے کیے گئے اقدامات سے آگاہ کیا۔

وزیراعلی نے جرائم پیشہ عناصر اورگینگز کے خلاف بڑے کریک ڈاؤن کا حکم دیا. پولیس کو جرائم پر کنٹرول کیلئے تمام تر ممکنہ وسائل فراہم کیے جائیں گے۔

چیف سیکرٹری زاہد اختر زمان، انسپکٹر جنرل پولیس ڈاکٹر عثمان ، ساہیوال، اوکاڑہ، پاکپتن کے ڈپٹی کمشنرز اورڈی پی اوز ، ایڈیشنل ڈپٹی کمشنر ریونیو، ایڈیشنل ڈپٹی کمشنر کوآرڈینیشن اور متعلقہ حکام بھی اس موقع پر موجود تھے۔